文:MenClub 魏文青  
POSTED ON 17 Aug 2022

全球首富Elon Musk經常都喺Twitter發表驚人言論,而最新「力作」就係今早佢於Twitter高呼「我準備收購曼聯!」令一眾不滿現任班主格拉沙家族好耐嘅曼迷相當興奮。不過Elon Musk係幾個鐘後就澄清,佢唔係真係打算買曼聯架,佢講下笑架咋!

事情就咁嘅,Elon Musk今早首先於Twitter發佈一句:「講清楚先,我係支持共和黨中嘅左派嗰半,以及民主黨中右派嗰半」大概係想表達自己嘅政治立場係中立,但隨後佢就自己回覆個發文話:「同埋,我準備買曼聯,唔使客氣」。結果第二句就引起網民熱烈討論。畢竟Elon Musk連市值440億嘅Twitter都話買 (雖然唔知依家成唔成事),要買身價僅為46億美金左右嘅曼聯對佢黎講其實唔難。再加上曼迷多年黎都不滿現任班主格拉沙家族,假若Elon Musk真係收購,或者會帶黎一番新景象?

不過大家都知Elon Musk鍾意亂講嘢,所以有網民就留言問佢「你係咪認真架?」結果於香港時間中午左右,Elon Musk就回覆「緊係唔係,呢個只係Twitter上一個留傳咗好耐嘅笑話,我冇諗住買任何體育隊伍呀」,「不過如果我真係要買,我又真係會揀曼聯,因為佢係我細個最鍾意嘅球隊」,然後佢仲順手澄清早前佢話要買咗可口可樂,再將可卡因放返入配方之中,「呢個都唔買呀,雖然大家都好似好支持。」