文:MenClub 波特先生  圖:互聯網
POSTED ON 04 Jun 2022

跳繩過去可能只係小學生小息時嘅遊戲,但經歷近年技術上嘅變化後,跳繩已經進化至職業運動,近日甚至擠身極限運動之列。

作為曾經嘅花繩世界冠軍,何柱霆早於2012年已經打破世界紀錄,當你以為佢已經去到極限嘅時候,呢位選手近日就嘗試「玩命」,挑戰以身體著火嘅情況下跳火繩!!

當你以為呢班花繩選手嘅跳繩技巧已經能人所不能之際,何柱霆就決定挑戰自己、超越自己,務求突破極限,做一啲自己未曾做過嘅事。

其實過去何柱霆已經試過跳火繩,但今次再玩大啲,將自己點火再跳火繩,原因係佢自己都未見過有人做過!而今次嘅極限挑戰,當然唔係咁簡單,背後有Red Bull團隊為佢籌備多時,其中包括多次練習以習慣火焰嘅熱力。另外,本來計劃入面何柱霆係需要戴上防熱手套跳繩的,原因係當中有動作係佢需要拋高火繩然後接回,如果失誤手就有機會被燒傷的,但最後為左增加挑戰難度,佢都係決定唔戴手套挑戰。

當然,挑戰嘅現場就梗係有齊安全準備,其中就有3 位滅火人員駐場,攝影棚內亦準備了4 支滅火筒、防火槳、噴水器、濕麻包袋等等嘅安全設備。

最終挑戰在安全嘅情況下,順利完成,何柱霆亦在沒有受傷下完成所有計劃下嘅動作,實在技驚四座!