文:MenClub 魏文青  
POSTED ON 22 May 2023

自兩年前同Vin Diesel公開鬧翻之後,Dwayne Johnson曾多次斬釘截鐵地講過唔會再出演《Fast & Furious》系列,但近期佢唔單止於《Fast X》嘅片尾彩蛋中現身,黎緊仲會參加系列最終章《Fast 12》,兩位光頭佬就算唔係冰釋前嫌,起碼都係講好數。而導演Louis Leterrier近日接受訪問時,就透露中間似乎係有「和平條款」嘅存在。

卻說Louis Leterrier早前接受《The Hollywood Reporter》訪問時,透露Dwayne Johnson嘅回歸背後,似乎係有個「和平條款存在」。佢表示:「個和平條款…我都算係有份 (幫手傾),我哋所有人都有份,最終係因為套戲所以傾掂。」佢表示幾個月前佢曾經於某個場合與Dwayne Johnson碰面,「我哋對望咗幾眼,然後我同佢講,我哋應該合作下。於是我就將個想法話畀監製同片商知,然後我哋聯絡Dwayne嘅團隊,叫佢黎睇下套戲先,都要佢鍾意套戲先有得傾。咁佢又真係黎睇,又真係鍾意,所以最後就傾得成。成件事都好順利。」

但佢就冇透露所謂嘅「和平條款」中,有冇包括點樣處理Dwayne Johnson同Vin Diesel兩位之間嘅關係。

Gal Gadot個角色於2013年嘅《Fast 6》已經死咗。目前未知系列會點解釋佢嘅回歸

另一邊廂,事件主角之一嘅Vin Diesel日前同樣公開回應事件,佢表示Dwayne Johnson以及Gal Gadot (同樣於彩蛋中登場) 嘅回歸「其實已經傾咗一陣。我哋傾嘅係點樣先製作到最好嘅電影?點做先到整個系列最有利?點樣令最多人嘅開心?好明顯佢哋兩個就係會令大家都開心。考慮到系列嘅主題就係團結,咁樣可以話係天作之合!」

資料來源:THR