文:MenClub 艾力克  
POSTED ON 23 Mar 2023

Fire in the Hole!!!正如早前傳聞所講,Valve今日正式發布CS系列最新續作《Counter-Strike 2》,並由即日起展開限定測試,預計今年夏季正式上市。

據官方介紹,由Source 2引擎製作嘅《Counter-Strike 2》係CS系列有史以嚟最大幅度嘅技術躍進,多張地圖將會全面升級,製作出更真實嘅材質、光線及反射效果,令整體變得更為清晰明亮。而煙霧彈機制亦會重新設計,變為動態體積物件,能夠同環境及遊戲事件互動,例如煙霧會從窗戶飄出、從階梯往上或向下擴散,喺走廊自然擴散等等,玩家亦可以透過子彈或高爆手榴彈「推開」煙霧,暫時清出視線。

另外,《Counter-Strike 2》亦會改善伺服器架構,降低遊戲延遲,令玩家們操作更為精準。遊戲預計今年夏季免費登埸,屆時所有《CS:GO》玩家均可免費升級,遊戲物品亦可以全數搬運到《CS2》。