文:MenClub 艾力克  
POSTED ON 05 May 2021

相信每個星戰迷都希望可以擁有一把光劍,不過現時市面上買到嘅光劍,極其量都只係一碌會發光嘅棍,正確啲嚟講應該叫「光棍」。大約一個月前,Disney Park體驗與產品主席Josh D'Amaro就喺一場發布會入面拎咗把「真.光劍」出嚟玩,由於會場禁止拍攝所以都係得嗰傳字。直到今日,Disney終於曝光呢把「真.光劍」真身,雖然唔係真激光,但效果絕對呃得下人!

從片中可以見到把「真.光劍」同過往產品完全唔同,唔開嗰陣尺寸只有劍柄咁大,一開機就好似電影入面咁有一條「光束」慢慢咁伸出嚟。

雖然官方並無公開原理,但網友們就從Disney註冊過嘅專利入面搵到蛛絲馬跡,估計「真.光劍」由幾個摩打加一卷LED燈組成,只要按粒開關制個摩打就會伸縮劍柄內嘅LED燈串,模仿光劍伸縮效果。為咗令各位更容易明白運作原理,VR開發者Ben Ridout仲整咗條動畫解釋。

據了解,呢把「真.光劍」仍處於開發階段,預計2022年先正式問世。暫時未知會賣幾錢,不過考慮到現時Disney「普通版」光劍都賣$200美金,相信呢把新作將會賣得更貴。

資料來源:The Verge