文:MenClub 魏文青  
POSTED ON 22 May 2023

AKB48「神七」出身嘅小嶋陽菜,曾經因其驚世美貌再加火辣身材而成為唔少男士嘅夢中情人,佢早年嘅雜誌寫真、個人寫真集更加係唔少人嘅深夜讀物。可惜嘅係,自從佢從團體卒業之後,就甚少有寫真面世。不過近日佢竟然再次拍攝水著寫真,而且相隔六年,風采依舊!

小嶋陽菜自卒業之後就慢慢淡出幕前工作,寫真更加係絕無僅有。一方面係2018年時佢被拍到與日本「DMM」旗下公司「PicApp」社長一齊出街,之後更傳出同居、就黎結婚嘅消息,雖然到目前都冇進一步消息,但若果消息屬實佢都真係唔憂做。另一方面亦係因為佢專心發展自己嘅品牌做社長,目前已經有服裝、內衣、美妝以及Cafe四門生意,近年IG上最性感嘅相亦只係為自家內衣品牌做宣傳,冇咩需要拋頭露面。

不過日前佢就突然為《GEKKAN YOUNG MAGAZINE》拍攝封面水著,加上4月時為《Young Jump》拍攝寫真,係佢事隔六年後再次拍攝雜誌水著寫真。而寫真公開後佢亦於自己嘅Twitter作宣傳,並呼籲Fans們睇完次後畀啲感想佢。而Fans們就話佢Keep得勁好,驟眼睇仲以為係幾年前嘅舊相,亦有人高呼一定會買雜誌,睇多50年都唔厭。

不過小嶋陽菜嘅帖文最後,就寫到「是最後了嗎…?」唔知係咪宣佈從此封胸。所以今晚就同大家睇新寫真之餘,同時又搵返啲舊相出黎回味一下啦!

IG:nyanchan22