文:MenClub 魏文青  
POSTED ON 20 Mar 2023

曾經何時,香港一街都可以見到唔同直播App嘅廣告,而每個直播平台又會有唔同嘅靚女座陣,甚至有啲直播主會將直播當係全職工作。而今日要介紹嘅呢位「もものすけ」就再進一步,由直播界踏入寫真界,最近仲推出首張寫真DVD。大家又覺得佢適唔適合呢?

現年21歲嘅「もものすけ」,早於16、7歲時就已經於日本「17 Live」中擔任直播主,去年先後參加「Miss Genic」以及由秋田書店推出嘅少年漫畫雜誌《Young Champion》舉行嘅「Miss Young Champion」兩個寫真選秀比賽,並分別成為冠軍以及決賽參加者,從此踏上寫真之路。

佢曾經為《FRIDAY》、《週刊Playboy》、《FLASH》等多本日本雜誌拍攝寫真,其最大賣點,就係非常白滑嘅皮膚以及號稱G Cup嘅上圍,而且單睇佢塊包包臉你都知佢身材比較肉感,應該屬於所謂嘅「棉花糖女孩」。另外佢自稱非常鐘意車以及恐龍,特別係恐龍,仲鍾意到會不停去日本福井縣嘅恐龍博物館以及東京上野嘅國立科學博物館,或者大家去參觀嗰陣都可以見到佢。

IG:momonosuke.1020