POSTED ON 02 Dec 2016
英國布里斯托大學物理學家同化學家組成嘅研究團隊，最近就喺一個科技年會上發表新發現，聲稱搵到妥善處理核廢料嘅方法之餘，更可以將核廢料轉化為「核鑽石電池，電池喺5730年之後仍可保持50%電力，相信要1萬年先可以完全冇電。
目前研究團隊以鎳進行實驗，但由於鎳嘅產量太少，所以佢哋目標係用石墨慢化反應爐處理嘅副產物「碳14」進行生產，利用高熱低壓處理，將廢料轉化為碳14鑽石，而呢種具短距離放射性嘅鑽石接近輻射場時，就會產生微量電流。如果用人工鑽石將佢封住，就可以阻擋危險輻射洩漏，變成安全嘅「核鑽石電池」。
雖然核鑽石電池係可以產生電力，但暫時輸出電力太細，加上製作成本高昂，相信要實行同普及仲有好漫長嘅時間。不過科學家認為核鑽石電池適合應用喺衛星同太空站，亦適合行星探測船使用，甚至可以用嚟製造人工心臟。核鑽石電池發現一公布之後，立即引來科學界熱烈討論，目前仍有好多未知問題同值得討論嘅地方，布里斯托大學亦呼籲向方參與討論同提供意見，希望可以利用新技術造福人類。
[Youtube]https://youtu.be/b6ME88nMnYE[/Youtube] |
