POSTED ON 27 Oct 2016
| 好多人話上kickstarter做backer買嘢易中伏，但其實將創意放上kickstarter一樣伏味濃郁。好似摺疊式自拍棍StikBox咁，未出就被人山寨已經好慘，而且backer更集體要求回水，慘上加慘呀！
去年底結合手機殼同自拍棍設計於一身嘅StikBox，喺kickstarter一上架就成為焦點項目。StikBox嘅以色列創辦人心諗呢鋪一定掂啦，點知產品上架唔夠一星期，佢就喺阿里巴巴見到自己設計嘅產品，而且只係賣$8美元，比佢定價嘅$47美元平咗一大截。當時仲未有好多人知，StikBox亦繼續宣傳吸引人支持，但由發貨日期一再延遲，加上愈來愈多人發現自己中伏，假貨比正貨好嘅淘寶又賣到成行成市，所以就引發backer集體要求回水。
目前StikBox仲未派晒貨，有backer甚至留言叫StikBox去淘寶買貨派畀佢哋仲快。其實由佢哋出「StikBox in Shenzhen!」呢個post開始，就應該有隨時收檔嘅覺悟，因為好多眾籌項目嘅生產地都係中國，等於送羊入虎口，甚至會發生告返轉頭嘅可能。
今次事件再令眾籌網站敲響警號，而平台缺乏監管同保護，相信同類事件只會愈來愈多。消費者去眾籌網站見到心儀項目，就算講到天花龍鳳，可以起死回生都好，如果冇一件真係work嘅原型產品的話，真係唔好亂支持，咁就可以減低中伏機會。 |
