Photos: Renault UK

去年底已開始傳新一代Megane Renault Sport將於今年發表，2016過咗4份之3，會唔會喺九月底嘅巴黎車展現真身呢？ 

外界好關心雷諾（Renault）仲會唔會喺新一代Megane Renault Sport設立手波版本，「有」同「冇」嘅說法都幾乎50 vs 50，唔知信邊個好。

其實，如果唔係諗住追新款（傳新一代至少300匹），今代Megane Renault Sport依然好吸引，動力、機械package相當不俗，最正係唔貴，易付擔，巿場亦有充足承接力，揸過唔啱易放售。原來，呢代Megane Renault Sport總產量有成30,000部咁多，銷售國家及地區約30個。

雷諾英國（Renault UK）日前宣布，最後一部今代Megane Renault Sport已經喺今年7月6日離開西班牙Palencia生產線。呢部車屬於右軚版275 Cup-S，Liquid Yellow顏色車身，Ohilins Road & Track鉸牙避震、19吋Speedline輪圈、Michelin Pilot Sport Cup 2輪胎，而且配埋Cup Chassis Pack，硬吸震筒、硬彈簧、硬防傾桿同Brembo制動系統，總之就係好齊料。英國售價31,930鎊（約32萬港元） 

Megane Renault Sport自2003年推出，以下簡表希望幫到你邊部打邊部

2003 Mégane Renault Sport 225喺法蘭克福車展發表

2005 Mégane Renault Sport 225 Trophy 亮相日內瓦車展

2005 Mégane Renault Sport 225 Cup 面世– 主要係機械方面升級

2005 Mégane Renault Sport 225 ‘Renault F1 Team’ 發表，慶祝雷諾F1及車手阿朗素（Fernando Alonso）奪得2005世界一級方程式製造商及車手總冠軍

2006 Mégane Renault Sport 230 ‘F1 Team R26’ 推出，紀念雷諾F1及車手阿朗素（Fernando Alonso）以 R26型F1 賽車蟬聯兩項世界冠軍，引擎最大馬力升至230匹

2008 Mégane Renault Sport R26.R 推出，刷新德國紐布靈賽道北圈「最快前驅車」時間，時間為8分17秒。車名之中最尾的R，代表radicale，法語解作極端、極度、最大程度的，比230 F1輕123kg。

2009 今代Mégane Renault Sport面世，喺摩納哥推出名為Mégane Renault Sport　250，呢代喺部份地區設有Sport（適合日常駕駛）and Cup（賽道駕駛）兩種調校版本。

2011 Mégane Renault Sport 265 Trophy 發表– 雷諾有史以來最快嘅「街車」，0至100km/h只需6秒，再刷新「紐北」前驅車最快時間8分07.97秒。

2012 Mégane Renault Sport 265面世

2013 Mégane Renault Sport Red Bull Racing RB8推出，慶祝紅牛Red Bull車隊夥拍引擎供應商雷諾三奪F1製造商冠軍，英國地區僅獲配30個名額。

2014 Mégane Renault Sport 275 Trophy-R 發表–再破「紐北」前驅車最快時間，縮短至7分54.36秒，英國右軚巿場獲配售30部。

2015 Mégane Renault Sport最大馬力由265匹增至275匹。

2016 今代最後一部Mégane Renault Sport喺7月6日離開生產線。