Photos: Iveco Australia Press Room

平治（Mercedes-Benz）萬能貨車Unimog係好多貨車迷嘅Dream Car，因為幾斜幾斜坡同勁爛嘅泥路都難唔到佢，真正係「大人之玩具」。但係，Unimog車價唔平，新車買，最簡單配備及規格都接近100萬港元，泊車問題係後話。

大佬，鍾意還鍾意，無理由無端端養部貨車喎？ 

算啦，買盒Lego Technic系列Unimog玩吓咪幾好囉，唔好諗咁多無謂嘢嘞！

意大利商用車製造商歐霸（Iveco）澳洲分部（Iveco Australia），一向有稱為Daily 4 x 4嘅四驅輕型貨車車系，既有單屋（Single Cab），亦有「孖屋」（Dual Cab）版本，呢款車一路有穩定數量嘅四驅越野車玩家支持，既可玩樂，又可以喺搵食工具車，幫到手做簡單搬運工作。有部索性當佢係純「玩樂車」。

[Youtube]https://youtu.be/2wKOa-d8scA[/Youtube]

廠方睇到有咁嘅巿場，最近為Iveco Daily 4 x 4推出更切合消閒用嘅設計，例如增加乘坐舒適性（懸掛軟熟啲）、加強車廂、地台隔音能力同提升車廂喺抵禦沙塵暴嘅能力，而喺明年初，Iveco Daily 4 x 4更可配備前座雙安全氣袋。

呢款車可配多種引擎，例如170匹3公升直6柴油引擎，峰值扭力40kgm，6前速手波及加力波，載重量介乎1.5噸至2.5噸（視乎引擎及規格表配搭），「孖屋」版售價約94,000澳元（約55萬），單屋88,000澳元（約51萬），就咁睇銀碼，仲算係大路價錢，而家買部唔知乜頭乜路嘅SUV都幾十萬啦，雖然，我都聽過廿幾年前嘅歐霸貨車嘅品質麻麻dee，咩「想放假　揸歐霸」吖嘛！